अस्ट्रेलियाले हटायो समलिङ्गी पुरुषलाई रक्त, प्लाज्मा दानमा लगाएको प्रतिबन्ध

मेलबर्न । अस्ट्रेलियाले समलिङ्गी र उभयलिङ्गी पुरुषलाई रगत र प्लाज्मा दान गर्नमा लगाएको प्रतिबन्ध पूरै हटाउने भएको छ । एचआईभी सङ्क्रमणको जोखिम उच्च ठानेर सरकारले यी समूहलाई रगत र प्लाज्मा दान गर्नबाट रोकेको थियो ।

आगामी महिनादेखि लागू हुने गरी प्रतिबन्ध हट्न लागेको हो । बेलायत र अमेरिकाले यस्तै खालको कदम चालेपछि त्यहाँको सरकारले पनि यो निर्णय गरेको हो । प्लाज्मा दानमा यौन गतिविधिमा आधारित सबै खाले प्रतिबन्ध फुकाउने अस्ट्रेलिया पहिलो देश बनेको छ ।

यो नियमलाई त्यहाँको स्वास्थ्य सामाग्रीको नियमन गर्ने नियामकले पनि पारित गरेको छ । अब भने एउटै पार्टर सँग मात्रै ६ महिना वा सो भन्दा बढी समयदेखि यौन सम्बन्धमा रहेका अधिकांश व्यक्तिले दान दिन सक्ने भएका छन् । यसमा उनीहरूको लिंग वा यौनिकता हेरिनेछैन ।

नयाँ नियम अन्तर्गत लाइफब्लुडले रक्त दान दिन आउने पुरुषलाई अघिल्लो तीन महिनामा कुनै पुरुषसँग यौन सम्बन्ध राखेको थियो कि भनेर सोध्ने छैन ।