गीतकार किरण खरेललाई सङ्गीत पुरस्कार

मकवानपुर, १६ माघ ।  गीतकार किरण खरेललाई बिहीबार हेटौँडामा बिजुलीमाया वनः श्रेष्ठ अन्तरराष्ट्रिय सङ्गीत पुरस्कार प्रदान गरिएको छ । भीम विराग सङ्गीत साहित्य कला प्रतिष्ठान नेपालले हेटौँडा एक समारोहबीच रु एक लाख नगदसहित खरेललाई पुरस्कृत गरेको हो । हेटौँडाका व्यवसायी कन्हैयाकृष्ण श्रेष्ठले आमा जीवितै रहँदा २०६४ सालदेखि यो पुरस्कार सौजन्य गर्दै आउनुभएको हो ।

गीतकार खरेललाई प्रतिष्ठानका अध्यक्ष केशवलाल श्रेष्ठले सम्मानपत्र प्रदान गर्नुभएको हो । विसं २०१४ देखि सङ्गीत क्षेत्रमा सक्रिय गीतकार खरेलले अहिलेसम्म सात सयभन्दा बढी गीत लेखिसक्नुभएको छ । लोकप्रिय गीतका सर्जक खरेलका चारवटा गीतसङ्ग्रह प्रकाशित छन् । आधुनिक गीत लेखनदेखि चलचित्र क्षेत्रमा समेत महत्त्वपूर्ण र सफल गीतका सर्जक खरेलको योगदानको उच्चमूल्याङ्कन गर्दै यस वर्षको अन्तरराष्ट्रिय सङ्गीत पुरस्कार प्रदान गरिएको आयोजकले जनाएको छ । प्रतिष्ठानले देश तथा विदेशमा रही नेपाली वाङ्मय क्षेत्रमा उल्लेखनीय योगदान पुर्याउँदै आएका सर्जक, स्रष्टालाई सम्मानित एवं पुरस्कृत गर्दै आएको छ ।

यो पुरस्कारबाट हालसम्म अम्बर गुरुङ, प्रेमध्वज प्रधान, भक्तराज आचार्य, फत्तेमान राजभण्डारी, शान्ति ठटाल, दीप श्रेष्ठ, प्रकाश श्रेष्ठ, न्हुछेबहादुर डङल, मीरा राणा, कर्म योञ्जन, चेतन कार्की, दावा ग्याल्मो, दीपक जङ्गम, किरण प्रधान, राजेन्द्र थापा र नीर शाह सम्मानित भइसक्नुभएको छ । उद्यमी तथा व्यवसायी श्रेष्ठले आफ्नी ममतामयी आमा बिजुलीमाया वनःको सम्झनामा २०६४ सालमा पुरस्कारको स्थापना गरी रु ५० हजारबाट सुरु गरिएका पुरस्कार राशि २०६७ सालदेखि रु एक लाख पुर्याइएको हो । कलासाधक भीम विरागको बहुआयामिक व्यक्तित्वप्रति सम्मानस्वरूप हेटौँडामा रहेको तरङ्ग सांस्कृतिक परिषद्को पहलमा २०५९ साल भदौ ७ गते भीम विराग सङ्गीत साहित्य कला प्रतिष्ठानको स्थापना भएको थियो ।