‘सुदूरपश्चिम प्रदेश सरकार कुम्भकर्ण जस्तो सुतेको छ’

धनगढीः नेपाली कम्युनिष्ट पार्टी (नेकपा) संसदीय दलका खगराज भट्टले भदौ २३ र २४ गतेको घटनाको छानबिन हुनुपर्ने बताएका छन्।

सुदूरपश्चिम प्रदेश सभा बैठकलाई प्रमुख प्रतिपक्ष दलको नेताको रूपमा सम्बोधन गर्दै उनले दुवै दिनको घटनाको छानबिन हुनुपर्नेमा जोड दिएका थिए। दुई तिहाइको सरकारले जेनजी आन्दोलनको जुलुस नियन्त्रण गर्न नसकेको टिप्पणी गरेका थिए। ‘२३ र २४ गतेको दुवै दिनको घटनाको छानबिन हुनुपर्छ,’ उनले भने, ‘२४ गतेको विध्वंस कुनै पनि राजनीतिक दलले गरेको भए दण्डित गर्नुपर्छ, उनीहरूलाई अपराधको कठघरामा उभ्याउनु पर्छ।’

भट्टले २३ गतेको घटनाले २४ गतेको परिस्थिति आएको हो वा होइन भन्नेबारे स्पष्ट हुनुपर्नेमा जोड दिएका थिए। ‘जेनजी आन्दोलनपछि केन्द्रमा सरकार हरायो, प्रदेशमा कुम्भकर्ण जस्तो सुतेको जस्तो हामीले देख्यौँ,’ उनले भने, ‘हाम्रो लागि दुःखद विषय बन्यो।’

बिचौलिया र दलालसँग कमिसन लिएर योजना बेचेको पनि आरोप लगाएका थिए। ‘जनताले इतिहासमा सबैलाई अवसर दिएका हुन्, तर हामीले त्यो सदुपयोग गर्न सकेनौँ,’ उनले भने, ‘कार्यकाल सकिन लाग्दासम्म पनि हामीले राजधानी टुङ्गो लगाउन नसक्नु सरकारको उदासीनता हो।’ प्रदेश सरकारले कुनै नयाँ काम नगरेको भन्दै सरकारको औचित्य नरहेको बताएका थिए।