April 30, 2026, Thursday
२०८३ बैशाख १८
Nepal 1:37:26 pm
जन आवाज महेन्द्रनगरः महेन्द्रनगरस्थित कञ्चनपुर कारागारबाट १६ कैदीबन्दीलाई बाँकेको नौबस्ता कारागार स्थानान्तरण गरिएको छ ।
बुधवार कञ्चनपुर कारागारभित्र दुई समूहबिच झडप हुँदा पाँच कैदीबन्दी घाइते भएका थिए । त्यसपछि कारागार प्रशासनले कैदीबन्दीलाई नौबस्ता कारागार स्थानान्तरण गरेको हो ।
केही समयअघि कैदीबन्दीबीच झडप हुँदा जिल्ला प्रशासन कार्यालयले यहाँबाट २० कैदीबन्दी स्थानान्तरण गर्न खोजेको थियो । स्थानान्तरणको तयारी गर्दा कारागारको परिस्थिति असहज बनेपछि तत्काल स्थानान्तरण टरेको थियो ।
जिल्ला प्रहरी कार्यालयका प्रहरी निरीक्षक विरेन्द्र सिंह थापाले कैदीबन्दी स्थानान्तरण गर्न आवश्यक भएको बताए । आपसी मनमुटावको विषयमा दुई पक्षबिच झडप हुँदा घाइते भएका र अन्यलाई स्थानान्तरण गरिएको हो ।
गत पुसमा पनि कारागारमा झडप हुँदा नौ कैदीबन्दीलाई स्थानान्तरण गरिएको थियो ।
