नगर प्रमुख भट्टले चलाएको सरकारी गाडी दुर्घटना

धनगढी : कैलालीको गोदावरी नगरपालिकाका नगर प्रमुख बिरेन्द्र भट्टले चलाएको सरकारी गाडी दुर्घटना भएको छ ।

धनगढी–अत्तरिया ६ लेन सडकखण्डस्थित धनगढी उपमहानगरपालिकाको गेटामा उनले चलाएको सुदूरपश्चिम प्रदेश ०१००१ झ ६०१ नम्बरको गाडी दुर्घटना भएको प्रहरीले जनाएको छ । गाडी दुर्घटनामा परेको अवस्थामा स्थानीयले देखेपछि प्रहरीलाई खबर गरेका थिए ।

जिल्ला ट्राफिक प्रहरी कार्यालय कैलालीका प्रमुख प्रहरी निरीक्षक रेशम आचार्यले दुर्घटनामा गाडीमा क्षति पुगेपनि मानवीय क्षति भने नभएको बताए । उनकाअनुसार गाडीलाई प्रहरी चौकी कैलाली गाउँमा राखिएको छ ।

अन्य कुनै क्षति नभएका कारण भट्ट तत्काल आफन्तसँग घर भएकाले मापसे परीक्षण गर्न नसकिएको प्रहरीले जनाएको छ । अहिले त्यसबारे थप अनुसन्धान थालिएको प्रहरी निरीक्षक आचार्यले बताए । भट्टले गाडी बुझ्न बिहानै प्रहरी चौकीमा चालक अनिल शाहलाई पठाएका थिए ।

तर, अनुसन्धान गर्नुपर्ने भन्दै प्रहरीले तत्काल गाडी नदिइएको जनाएको छ ।